डोले रसवंती बयरिया हो रामा-सगरी नगरिया- बसंती चइता

डोले रसवंती बयरिया हो रामा-सगरी नगरिया

चइता चतुर चित चुपके चोरवे

चंदा चहकि चाँदनी चटकावे

छल कलि रस के गगरिया हो रामा-सगरी नगरिया

डोले रसवंती बयरिया हो रामा-सगरी नगरिया

पिपरा के डारी लहरे कंचन पाती

निमिया झरेले जइसे लवंगहि लाची

खुली गइली गन्ध के गठरियाँ हो रामा- सगरी नगरिया

डोले रसवंती बयरिया हो रामा- सगरी नगरिया

ढंरकलि धरती के चढ़ली जवनियाँ

देखते देखते जैसे हो गईली जोगिनिया

ओढ़ी राम नामी चदरिया हो रामा-सगरी नगरिया

डोले रसवंती बयरिया हो रामा- सगरी नगरिया