फगुनहटा
दिनवा हउवै अबले बदराइल
फगुनहटा बाय कहाँ हेराइल
सियार सिवाने लउके लगलैं
खरहा खर में छउंके लगलैं
पिल्ली छहगो पिल्ला दिहलसि
मनई रहि-रहि ठउंके लगलैं
सरसों पक्कल न रहिला लदराइल
फगुनहटा बाय कहाँ हेराइल
ऊंखि छोड़ि दिहले सिवान बा
गदरा धइ लिहले दुकान बा
बेतुक क दई पाथर पड़लैं
मूड़ थाम बइठल किसान बा
गोंहू लरकल जउवो सुरकाइल
फगुनहटा बाय कहाँ हेराइल
हइदेखा ना अजब तमाशा
लसराइल बा अबो कुहासा
अजुए जरावल जाई सम्मत
बुन्नी फोड़ति बाय बताशा
लवना- पल्लो कुल्ही मेहराइल
फगुनहटा बाय कहाँ हेराइल
फगुनहटा- फागुन में चलने वाली हवा
बदराइल- बादलों से भरा हुआ
हेराइल- खोया हुआ, सिवान- गांव की सरहद
खरहा- खरगोश,खर- घास,छंउके लगलैं- कूदने लगे
पिल्ली- कुतिया,ठंउकना- ठिठकना
रहिला- चना,लदराना- पेट का भरपूर हो जाना
गदरा -हरी मटर, दई- इंद्र देवता,मूड़-सर
लरकना - लोट जाना, सुरकाइल- जिसके दानों को बिना डंठल तोड़े मुट्ठी से खींच लिया गया हो
लसराइल- गोंद की तरह चिपक जाना
सम्मत- होलिका, बुन्नी- बारिश की बूंदे
लवना-पल्लो- जलावन की लकड़ी और पत्तियां
मेहराइल- नम हो जाना
डॉ एम डी सिंह
कोई टिप्पणी नहीं:
एक टिप्पणी भेजें